يم عيني لاتقترب

يم عيني لاتقترب صد عنها اذا نلتقي
ويم كلبي لاتعتني خوفي النبض يزعجك

يم روحي خلي الكلب ناسي ولااذكرك
حتى من اموتن تظل روحي بفرح تحضنك

تسألني ليش الجفا وليش القساوة بجرح
اسألك من ياجرح تجرح وانا اضمده لك

ملت خيوطي الابر وعافت دروبي السفر
وقفلت باب الكلب عن لايحن يشتاكلك

جاوبني مرة بصدك خليني اعرف شجرى
اشبدر مني اشحصل ياخلي وانتة شبدلك

لاتحجي عينك جاوبت ولغيري وديت الكلب
وبيدك عفت كل العمر ياخلي بس مرهون الك

جازيتني دمعة وسهر وأيام ذابحهة القهر
سجين غدرك بينت معدن شنو الي بداخلك

مو ذهب غلطان طلعت وامنت بيك وصدكت
ومن الدمع محبس الك بيده الدهر هم صاغلك

وهذا الحجيته اشتظن بس شعر واوراقه تون
هذا الاحسه بكل جرح بية يفز ويكتلك

خليك مرتاح بهنا عيش الدقيقة بكل سنة
مرت علي من فركتك واشلون ناسك تهملك

اعوج يظل عودك ترى لاتظن مرة ينصلح
لو ينصلح جان الوكت وياي يكدر يعدلك

لهنا وبس كافي بعد مليت حبك والوعد
وكتبت شعري بالعتب ميرد بعد ويغازلك

وابياتي هم ملن ترى وعالموت بس كضن سرى
ودعن طيفك والجفن يتعذر ومايحملك

قاسي بصدك انتة طلعت وبهاي انه تاكدت
مامره كلبك علي لو بالجذب مايسألك ؟؟؟؟؟؟

تحياااااااااااااااتي