( تل الورد )
قصيدة للشاعر العراقي / عريان السيد خلف
عاتبني ابعتابك خل ترد روحي
اوهسني . . ابدلالك . . ياشتل شمام
حتى ازهگ . . وشوفك وينها اجروحي
بيه اشبع غرورك . .
يا أعز چتال
يتمايل غنج لو بيه . . ثكل نوحي
تعاتبني اعله حالك . .
صار بيك الصار
جاشدل اجروحك هاي وشتوحي
گبل حبك . . جبل مالاح طرفي السيل
هسه اول زخاخ
ايغطن سفوحي !
ومنك ماروت يدعج بعد روحي
ولا رادت . . ولاسمعت . . ولاحبت
لاتحمل .. نجاة .. ابليل لوغنت
اعلمها الورع . . واطبگ عليها الباب
تذكر ضحكتك . . واجهرت ماعنت
لا لامتك ليش . . وشوفك اصبح طيف
اشلون ابعدت عنها . .
اشلون ماجنت !
وعيونك ابغير عيونها اتهنت
وجفوفك ابغير اجروحها اتحنت
يا تل الورد . . تل آخر السباح
حته اطفه . . من اشوف ارويحتي انتلت
كلت انجفه الماي . .
وذبل عود الياس
والوادم نست
وبغيرنه اتسلت
وأول ما شفت طولك نسيت الصوت
وروحي بلاسبب بجفوفك افتلت
يا قمرة حياتي البعد ما هلت . .
يا انت . . وكفاني اتوهدنت وياك
تحسبني . . وحسبتي وياك ما فلت
كلمن عرف وشره . . وشال منها الشال
وتعده العمر والوادم اندلت
هسه الراح راح . . وبين ايديك الروح
بس ذمه ابركبتك يوم لو سلت
رسالة sms
